Соналдаса соналде цIикIкIунеб буго Россиялъул, Европаялъул ва тIолго дунялалъул къецазда бергьарал чемпионал-дагъистаниязул къадар. Гьадинаб инфорграфика жакъа гьабулебани жеги тIадегIанаб бакIалда букIинаан Дагъистаналъул спортивияб къадру.
Амма жиндирго тIаса бищараб спортивияб командаялъул изну гьечIо халкъаздагьоркьосел къецазда гIахьаллъизе гьединлъидал гучал ва кIудияб спортивияб гьунар бугел дагъистанияз чияр улкабазул спортивияб къадру цIикIкIинабулеб буго.
Ахирисел соназ дунялалъул спортивияб горизонталда раккарал цIиял цIвабзазда гьоркьов вуго боксер Артур Бетербиев. Гьев гьавуна I985 соналда Хасавюрталда. Гьесул тIоцевесев тренерлъун вукIана Нурпаша ТIалибов. ГьабсагIат ТIалибов хIалтIулев вуго «Бакуялъул цIаял» абулеб профессионалияб боксалъул клубалда. Гьесул ва Артур Бетербиевасул хIакъалъулъ нижер программаялъе баян гьабуна рехсараб клубалъул нухмалъулев Ризван Генжеевас.
Ризван Генжеев: «Гьесул тIоцевесев тренерлъун вукIана Нурпаша ТIалибов. Ахирисеб заманалда гьев хIалтIулев вуго дир клубалда. Щибха абилеб? Дунялалъулги Европаялъулги чемпион. Лондоналда рукIарал къецаздаса нахъе гьев вахъана профессионалияв боксёрлъун.
Промоутеразул кампаниялъ гьесие кумек гьабуна. ГьабсагIат Артурица жиндирго эбелгун Канадаялда гIумру гьабулеб буго. Гьесул тIоцевесев тренер ТIалибов сон Азербажаналъул миллияб тIаса бищараб командагун Мексикаялде ана».
Боксёр хIисабалда Артур цевевахъана лъимерлъиялъул мехалда. Гьесие щун букIана гIемерал шапакъатал ва икъбалал. 2006 соналда гьес къотIи-къай гьабуна «Магниткаялъул ринг» абулеб клубгун ва гочана Магнитогорскалде.
Добго соналда гьесие щвана тIоцебесеб кIвар цIикIкIараб мунпагIат. Артур вахъана Европаялъул чемпионаталъул призёрлъун. 2007 соналда гьесие щвана дунялалъул чемпионаталъул гIарцул медаль.
2008 соналда Артур Бетербиев гIахьаллъана Пекиналда рукIарал Олимпиялъул хIаязда. Амма доб соналда гьесда кIвечIо пьедесталалде гали тIамизе. Гьедин ккун букIаниги, Артур кIудияб яхIгун гIамал гьабуна спортивияб борхалъиялде вахине. КватIичIого щвана бергьенлъаби.
Гьале ахирисеб. Июль моцIалъул ахиралда Бетербиевасул промоутер канадияв Ивон Мишелица BoxingScene абулеб интернет сайталъе лъазабуна Артур разилъанин Россиялъул спортсмен Сергей Ковалёвгун къацандизе.
Гьелда цебе Лас-Вегасалда Ковалёв рингалда данделъана Кубаялдаса боксёр Наджиб МухIамадигун ва нокауталдалъун гьесдаса берьгана.
Мишелица абуна, Халкъаздагьоркьосеб Боксалъул Федерациялъул сияхIалда Бетербиевас кIиабилеб бакI кколеб бугин. ТIоцебесеб бакIалда вукIарав МухIмади къун хадусала, Федерациялъ ахIи бана – претендентасул цIаралъе гIоло къацандизе. Жал разиял ругин, такрар гьабуна Артур Бетербиевасул промоутер Ивон Мишелица, аммаила тIаде жубана гьес - данде кколеб финансияб хайир щвани.
Ковалёвасул промоутерас жиндир иргаялда лъазабуна Ковалёвасулгун Бетербиевасул къец букIине бугин ноябрь моцI алда Москваялда. КватIичIого гьеб суалгун гьоркьоб кIалъа-басаял тIоритI ила.
Исана 13 июналда Артур Бетербиевас анкьабилеб раундалда нокаут кьабун, американияв Александр Джонсоналдаса бергьана. Гьеб буго гьесул ахирисеб къец.
ГьабсагIат Бетербиевас хIадурлъи гьабулеб буго бищун кIвар цIикIкIараб жиндирго иргадулаб къецалде.
