ГучучгIалиевасул адвокат МухIамад Лабазандибировас бицана ахирисел къоязда тIоритIарал процессазда цIех-рехалъул материалал цIалулел рукIанин.
«Анкьида жаниб диваналъул лъабго-ункъго данделъи букIуна. Араб анкьалдаса байбихьун ГучучгIалиевасул гIайиб чIезабулел документал цIалулел руго. Байбихьудаго диванчияс абун букIана, тIоцере нугIзазухъа соравал росине ругин, хадуб материалазул хал-шал гьабилин. Амма нугIзал диваналде щаялиго рачIунел гьечIо, гьелдалъун, заман цIачIого букIинеилан, диванчияс процессалъул план хисана», - ян бичIчIизабуна адвокатас.
Лабазандибировасул рагIабазда рекъон, гIайиб гIунтIизабулеб рахъалъ ай прокурораз лъазабуна гьезул 127 нугI вугин. Анкьго нугIазухъа гурони сорав босичIо. Гьел анкьалго ккола Дагъистаналъул тIадегIанаб диванханаялда хIалтIулел чагIилъун.
ГучучгIалиевас чIваравлъун низам цIунулез рикIкIунев диванчи МухIамад МухIамадовасе хIинкъаби рачIунел рукIанин бицана гьевгун цадахъ хIалтIулел рукIараз. Гьесие хъаравулзабиги рихьизарун рукIун руго. 2013 соналъул 15 сентябралда жиндирго минаялъул азбаралда гьев чIвана лъабгояз. КъотIнор ругел видеокамераз бахъана гьеб лъугьа-бахъин. НугIзазда гьеб видео бихьизабуна, амма гьезда чIвадарухъаби лъачIо.
«Диванчи МухIамадовасул коллегабаз абуна гьесие хIинкъаби рачIунел рукIанин, амма гьезда кIвечIо мухIкан гьабун бицине лъица гьесие хIинкъаби кьолел рукIарал ва щиб сабаблъун гьев хIинкъизавулев вукIарав», - илан бицана Лабазандибировас.
Адвокатас абухъе, ГучучгIалиевасе операция гьабизе ккола. «Низам цIунулез гьев кколев мехалда, гьесда гуллби щвана. Кваранаб квералъе операция гьабун букIана, амма МахIачхъалаялда бугеб цIех-рехалъул изоляторалда гьесие букIине кколеб медикияб кумек гьабичIо хадуб. ТIадежоялъе, гьесие гьениб гIакъубаби кьолел рукIана.
Гьелдалъун квералда лъун букIараб маххул пластина рукьби ругел бакIалдаса хъищтIун буго. Гьесул квер хIалтIулеб гьечIо, дал-дализабун квергун вуго гьев. Гьеб квер квешго унтулеб бугин, гIарзаби ругоан ГучугIалиевасул. Диваналъул жиб-жиб данделъиялда гьесие операция гьабизе кколин абулаан адвокатаз, амма диванчияс къабул гьабичIо жеги гьари. Операция гьесие гьабичIони, гIагараб заманалда квералъе ампутация гьабизе ккела», - ян бицана адвокатас.
ГучучгIалиевасул кIиабилев адвокат Константин Мудуновасул рагIабазда рекъон, жинде гIайиб гIунтIизабулесе операция гьабеян гIарза хъван букIана я Ставрополалъул УФСИНалдеги, я Дагъистаналъул УФСИНалдеги. «Щвана жавабал, иргаялда лъун вугин хъван буго кагътазда. Гьесул цояб хIетIе хIалтIулеб гьечIо, гьеб къотIизе кколин абулеб буго тохтураз. Кверги гьебго хIалалде ккезе буго гьедин тани. ЦIех-рех чагIаз гIакъуба кьун букIинчIебани, кинабгIаги операция къваригIине букIинчIо», - илан абуна Мудуновас.
Константин Мудунов: «ГIакъуба гIадатияб ишлъун рикIкIунеб буго гьанже. Гьел кьолел ругин абулеб жоялдаса жакъа къоялда гIажаиблъулев чи ватизе гьечIо. ГIунтIизабулел гIаийбазе мукIурлъизе тIамулев вукIана ГучучгIалиев гIакъуба кьун, хIинкъизавун. ТIадежоялъе диванчияс гьесул ихтиярал хвезарулел руго. Диваналъул процессазда уколал гьарулел руго ГучучгIалиевасе - гьесда унти хIехьезе кIолеб гьечIо. Диванчиясда гьеб бихьулеб буго, амма нижер гIарзаби щаялиго нахъчIвалел руго, абулеб буго гьел хIужжаби уяллъун ратичIин».
Ставрополь икълималъул диванханаялда баянал щвечIо «Эркенлъиялъе». Канцеляриялда абуна процесс рагьараблъун кколарин ва гьелдалъун гьелда тIаса баянал кьезе диванханаялъул вакилазул ихтиярал гьечIин.
