МагъчIваялъе рес

Экспертал: Немцов чIвараб бакIалъул ва заманалъул кIвар кIудияб буго


Agentura.ru сайталъул редактор Андрей Солдатов
Agentura.ru сайталъул редактор Андрей Солдатов

27 февралалда опоозиционияв политик Борис Немцов чIваялъул цIех-рех тIадбан унеб буго ва гьелъие нухмалъи гьабулеб бугин абизе бегьула Россиялъул низам цIунулел идарабазул бищунго тIадегIанасеб даражаялдайин. Гьебго заманаялда хIинкъигьечIолъи цIуниялъул рахъалъ эксперт Андрей Солдатовасул кинабгIаги хьул гьечIо гьеб такъсир киданиги рагьизе кIвезе букIиналда.

Оппозиционияв политик Борис Немцов чIван вукIана Кремлалда гIагарлъухъ, Россиялъул бищунго контроль цIикIкIарабин абизе бегьулел бакIазул цоялда. Гьебго заманаялда Agentura.ru сайталъул редактор ва Россиялъул хасал хъулухъазда хурхун чанго тIехь хъварав Андрей Солдатовасул хьул гьечIо гьеб такъсир рагьизе ва гьеб гьабурал тамихIалде цIазе рукIиналда.

Андрей Солдатов: «Дир хьул гьечIо гьеб такъсир рагьизе букIиналда. Гьелъиеги буго кIиго гIилла: цо бугони, дида ракIалдаго гьечIо гьединаб тIадегIанаб даражаялъул «ликвидациялъул» хасаб операция (гьелда гьедин абизе бегьулеб батаниха) кида гьабун букIарабали, кIиабизе- гьелдаса гIемерго гIодобегIанасеб даражаялда гьарурал такъсиралцин ай чи чIвазе тIадкъаял кьун гьарурал такъсиралцин рагьун рукIинчIелъул. Узухъда, гьеб кьерулъ тIоцебесеб бакIалда буго Анна Политковская («Новая газетаялъул» эксперт ва инсанасул ихтиярал цIунулей. ред) чIваялъул иш. Пачалихъалъ лъазабулеб буго гьеб иш рагьун бугин, щайгурелъул гьеб иш гьабурал чагIи ккун ругин, амма гьеб гьабизе тIадкъай кьурал чагIи щалалицин лъазабулеб гьечIо».

Солдатовас кIвар буссинабулеб буго гьеб такъсир гьабулеб заман камераялъ бахъун букIаниги, гьеб параялда камераялдаги, ракIалде кковехъе, Немцовгун гьесда цадахъ йикIарай гIаданалдаги гьоркьобе къватI бацIцIунеб машина бачIин гьев чIваялъул операциялде гьоркьобе унеб букIараб батизеги рес букIиналде.

http://www.youtube.com/watch?v=jqFdS332BQg

2 марталда Коммерсанталъ хъвалеб букIана гьеб камераялъ бахъараб видео гурониги, гьелдаса такъсир ккараб бакIалде гIезегIанго аскIорегIан ругел камерабаз бахъараб къватIибе кьолеб гьечIин, гьеб къоялъ гьел камераби хIалтIулел рукIинчIогойин. Амма дагьаб кватIун цIех-рехчагIаз нахъчIвана гьеб версия.

Солдатовас рикIкIунеб буго Немцов чIваялъул такъсир цоцалъ лъикIаб координация букIарав чанго чияс яги чанго командаялъ гьабураб бугин.

Андрей Солдатов: «Гьеб бакIалъул проблема батIияб буго: гьеб камерабазде бахъун букIиналъул яги букIунгутIиялъул гуреб, проблема буго гьениб кколеб аскIосан унел автомашинабазда рекIаразда яги цоги гIадамазда бихьичIого хутIизе рес гьечIолъиялъулъ. Гьеб бакIалда щиб букIаниги гьабизе тIаде босарал чагIазда гьоркьоб букIине ккола цIакъ лъикIаб бухьен ва гьеб цIакъ мухIкан ургъун букIине ккола. Дир ракI чIараб буго гьеб ишалъулъ чанго чи гIахьаллъун вукIиналда. Рес буго гьениб чанго команда гIахьаллъун букIинегицин».

Гьесул пикруялда, Немцов цоги бакIалда яги заманаялда гIезегIан бигьаго чIвазе рес букIана, амма хас гьабун гьеб заманаялда ва гьеб бакIалда гьев чIваялъул буго символикияб магIна.

Андрей Солдатов: «Рес букIана гьеб такъсир гьабизе гьелдаса гIезегIанго «лъикIаб» бакIал балагьизе. Рес букIана гьединго такъсир гьабураб ярагъ яги къагIида гIемерго лъикIал тIаса рищизеги. Гьеб бигьаго гьабизе бегьулеб иш букIана, масала рукъалъул кIалтIа яги цоги гьелда релъарал бакIазда. Амма гьаб нухалда тIаса бищун буго захIматаб къагIида. Гьелда гIахьаллъизеги кколел рукIана кутакалда махщел бугел, гьебги гIемерал, гIадамал. Гьелдалъун дие абизе бокьун буго, ГРУялъул гIадатияб спецназалъул хIадурлъи гьеб ишалъулъ гIезе букIинчIин. Гьеб буго цIакъ профессионалияб командаялъ гьабураб иш.

БичIчIулеб буго марш тIобитIун анкьидасан гьединаб жо гьабизе гIемерго бигьаго букIараблъи. Амма, щаялиго, гьев чIвана маршалда цеве. Гьелъулъги буго хасаб магIна».

http://www.youtube.com/watch?v=jqFdS332BQg

XS
SM
MD
LG