МагъчIваялъе рес

Спорт: ахирисел харбал. 6-билеб Ноябрь


Гьалкъояз Дагъистаналъул спортсменазе щварал иргадул берьгенлъаби ва икъбалал.

Ахирисеб кIиго соналда жаниб «Анжи» командаялъе гьедегIан кIудиял икъбалал щун гьечIониги, гьелъул цо-цо футболистазул тIадегIанаб рейтинг буго. Масала Россиялъул Футболалъул Миллияб Лигаялъ лъазабуна, октябрь моцалъ бищун лъикIав футболистасе гьаркьал кьеялъул ахирисеб тадбир байбихьанин. АнцIго кандидатазда гъорлъ вуго МахIачхъалаялъул «Анжи» командаялъул кIигояв – голкипер Михаил Кержаков ва гьужум гьабулев Янник Боли.

Гьезие гIоло гьаркьал кьезе бегьула Вконтакте абулеб социалияб сайталда Футболалъул Миллияб Лигаялъул интернет гьумералда ва жибго Лигаялъул официалияб сайталда.

Гьал гIагардисел чанго къо «Анжи» командаялъ базе буго Москва икълималъул Кратово шагьаралда бугеб хIалбихьи гьабулеб централда. Гьениб командаялъ хIадурлъи гьабизе буго 8 ноябрялда Калининрадалдаса «Балтика» командагун букIине бугеб хIаялде. 18 туралъул гьеб хIай тIобитIизехъин буго Калининградалда.

Дагъистаналъул гIолохъанал дзюдоистаз гIамал гьабулеб буго 2015 соналда Россиялъул чемпионаталда гIахьаллъизе. Майкопалда тIобитIараб цебеккунисеб къецалда гIахьаллъарал Паша Хавхачаевасе гIарцул ва ТIагьир ТIагьировасеги Вацлав Давудовасеги – мазгарил медалал щвана.

19 ноябрялдаса байбихьун 24 ноябрь щвезегIан Санкт-Петербургалда тIоритIизехъин руго «Петр ТIоцевесевасул Кубокалъе» гIоло столалда хIалеб теннисалъул сакъатал гIадамазул къецал.

Гьезулъ тIоцебесеб нухалъ гIахьаллъизе вуго дагъистанияв Расул Назиров. Гьадин лъазабулеб буго республикаялъул спорталъул министерлъиялъ.

Гьаб соналъул ахиралда Назировасе кьезехъин буго спорталъул мастерасул цIар.

Дагъистаналъул спортсменаз жигараб гIахьаллъи гьабулеб буго цогидал регионазул жанисел къецаздаги. Мисалалъе босани Краснодар икълималъул.

Гьениб дагьалъ цебе тIобитIараб эркенаб гугариялъул рагьараб турниралда Кубанялъул спортсменаздаго цадахъ гIахьаллъана дагъистаниялги.

XS
SM
MD
LG